• Mendoni se negociatat e reja maxhorance-opozite do t´i japin fund krizes?

PO

JO

Ndoshta

Se di

[ Rezultate ]

OKB: Rezoluta serbe, e papranueshme

Nju Jork – Rezoluta që Serbia dorëzoi dje për shqyrtim në Asamblenë e Përgjithshme të OKB-së, është kundërshtuar nga pjesa më e madhe e anëtarëve të përhershëm të Këshillit të Sigurimit.

Shtetet e Bashkuara, Britania e Madhe, Gjermania dhe Franca e kanë cilësuar të papranueshëm tekstin e rezolutës pasi në të thuhet se  Serbia dhe Kosova duhet të vendosin “dialog për të gjitha çështjet e hapura”. Sipas këtyre shteteve, të cilat kanë mbështetur fuqishëm pavarësinë e Kosovës, në fakt duhet të bëhet fjalë për “bisedime për çështje teknike” e jo për “të gjitha çështjet e hapura”.

“Duhet të specifikohet qartë, pasi për Serbinë çështje e hapur është edhe ajo për statusin, ndërkohë që ne vlerësojmë se Kosova është shtet sovran dhe i pavarur dhe se nuk mund të ketë bisedime për statusin e saj”, shkruan e përditshmja serbe Blic, duke iu referuar një diplomati të huaj të mirëinformuar.

Sipas Ministrisë së Jashtme të Serbisë, me anë të rezolutës që Beogradi dorëzoi dje, i propozohet Asamblesë së Përgjithshme të OKB-së qëndrimi i palës serbe rreth opinionit këshillëdhënës të Gjykatës Ndërkombëtare të Drejtësisë. Mediat serbe bëjnë me dije se anëtarët kryesorë të BE-së këmbëngulin që në tekstin e rezolutës të saktësohet se bëhet fjalë vetëm për “bisedime teknike mes Beogradit dhe Prishtinës”, të cilat ato vetë i përkrahin.

Pavarësisht veprimeve të Serbisë, Kosova planifikon që në vjeshtë përmes aleatëve të saj ta paraqesë një rezolutë të veten në Asamblenë e Përgjithshme të OKB-së, në të cilën do të prezantohet qëndrimi i qartë i Gjykatës Ndërkombëtare të Drejtësisë për ligjshmërinë e pavarësisë së Kosovës. Deri tani shteti i ri është njohur nga 69 shtete, ndërkohë që synohet që ky numër të arrijë në 100 para mbledhjes së Asamblesë së Përgjithshme të OKB-së në shtator.



                                                                                             2010-07-29 11:14
   

[        Vendos në Facebook ]